Positive Media & Press Release Network
Select Language: मराठी
जोग फॉल्स : शिमोगा या जिल्ह्याच्या ठिकाणापासून ९५ किलोमीटर अंतरावर शरावती नदीवर हा प्रसिद्ध धबधबा आहे. शरावती नदीचा उगम तीर्थहळ्ळी तालुक्यात अंबुतीर्थ नावाच्या एका ठिकाणाहून झाला आहे. प्राचीन आख्यायिकेनुसार, सीतेची तहान भागविण्याकरिता पाणी मिळविण्यासाठी श्रीरामांनी या ठिकाणी आपल्या धनुष्यातून या ठिकाणी बाण (शर) मारला आणि तेथून पाणी उसळले. त्यावरून शरावती हे नाव रूढ झाले. ही पश्चिमवाहिनी नदी १२८ किलोमीटर प्रवाहित होऊन होन्नावर येथे अरबी समुद्राला मिळते. जिल्ह्याच्या वायव्य सरहद्दीवर ही नदी पश्चिमेला वळते. याच ठिकाणी जोग गावाजवळ प्रसिद्ध जोग फॉल (गिरसप्पा धबधबा) आहे. येथे नदीपात्र सुमारे २२७ मीटर रुंद असून, चार स्रोतांनी धबधब्याचे पाणी खाली कोसळते. राजा, रोअरर, लेडी किंवा राणी व रॉकेट या नावांनी हे प्रपात प्रसिद्ध आहेत. 
राजा हा मुख्य धबधबा ८३० फूट उंचीवरून एखाद्या स्तंभासारखा कोसळतो व पाणी तेथे असलेल्या १३२ फूट खोलीच्या नैसर्गिक कुंडात जाते. दुसरा ‘रोअरर’ हा धबधबा बाजूने येऊन राजा धबधब्यात मिसळून जातो. या ठिकाणी होणारा आवाज मंत्रमुग्ध करून टाकणारा आहे. शरावती नदीखोरे प्रकल्पातील धरणे, पाण्याचे बोगदे, वीजनिर्मिती केंद्रे ही पर्यटकांची आकर्षणस्थळे आहेत. होन्ने मराडू हे लिंगनमक्की धरणाने बनविलेल्या जलाशयावरील एक बेट आहे. हे ठिकाण जलक्रीडेसाठी प्रसिद्ध आहे. स्कूबा डायव्हिंग, वॉटर स्कूटर वगैरे खेळांची सुविधा तेथे आहे. तसेच तेथे पक्षी निरीक्षणही करता येते. सिंहाप्रमाणे आयाळ असलेली माकडे येथे बघण्यास मिळतात. 
अचकन्या धबधबा : तीर्थहळ्ळीपासून १० किलोमीटर अंतरावर होसानगरजवळील अरलसुरुलीकडे जाताना हा धधबधबा लक्ष वेधून घेतो.
बाळेगावी : तिसऱ्या व चौथ्या शतकातील सातवाहन व कदंब राजवटीपासून या गावाचा उल्लेख आढळतो. ११व्या ते १२व्या शतकातील पश्चिमी चालुक्य राजवटीत बाळेगावी हे एक महत्त्वाचे शहर होते. येथील अत्यंत देखणे असे केदारेश्वर मंदिर इ. स. १२००मध्ये बांधले गेले असावे. 
बंदालिके : हे ठिकाण बांधवपूर म्हणूनही ओळखले जायचे. हे एक जैन तीर्थक्षेत्र असून, ऐतिहासिक ठिकाण आहे. इ. स. ३००पासून याचे उल्लेख सापडतात. पूर्वी हे ठिकाण कदंब राजांच्या आधिपत्याखाली होते. त्यानंतर राष्ट्रकूट, चालुक्य, होयसळ, विजयनगर अशा राजवटींनी येथे राज्य केले. दहाव्या शतकापासून या शहराला महत्त्व प्राप्त झाले. येथील सर्वांत जुना शिलालेख इ. स. ९२९मधील आहे. येथे सुमारे ३१ शिलालेख आहेत. ११८५मधील शिलालेखावरून या गावाची पुनर्ररचना केल्याचे दिसते. १२०३मधील शिलालेखावरून येथे होयसळ राजवट आल्याचे दिसून येते. येथील मंदिरेही बघण्यासारखी आहेत. 
चंद्रगुट्टी : हे ठिकाण पूर्वी चंद्रगुप्तपुरा या नावाने ओळखले जायचे. हे सह्याद्रीच्या रांगेतील खडकाळ उंच डोंगरावर वसलेले एक सुंदर ठिकाण आहे. परशुरामाची माता देवी रेणुकाम्बा हिच्या मंदिरासाठी हे प्रसिद्ध आहे. जवळच किल्ला असून, तो कदंब राजवटीपासून आहे. शिलालेखावरील माहितीनुसार, १३७७मध्ये विजयनगरचा सरदार बचन्ना याच्या आधिपत्याखाली हा किल्ला होता. हा किल्ला ट्रेकर्ससाठी खूप छान आहे; मात्र तो भग्नावस्थेत आहे. 
साकरेबायलू (एलिफंट कॅम्प) : गजनूरजवळ भारत सरकारद्वारे चालविले जाणारे एक हत्ती प्रशिक्षण केंद्र आहे. येथे पाण्यात खेळत असणारे हत्ती पाहणे हा मुलांसाठी आश्चर्यकारक अनुभव असतो. जंगलात लाकूड वाहतुकीसाठी हत्तीचा उपयोग केला जातो. त्यासाठी हत्ती प्रशिक्षित केले जातात. येथे फक्त सकाळी आठ ते साडेअकरा या वेळेतच प्रवेश मिळतो. 
गुडवी : हे पक्षी अभयारण्य ७३.६८ हेक्टर क्षेत्रावर पसरलेले आहे. येथे एक नैसर्गिक तळेही आहे. १९९३च्या सर्वेक्षणानुसार असे आढळले आहे, की या ठिकाणी १९१ पक्षी आढळतात. व्हाइट पेबिस, स्टोन बिले, एग्रेट, कॉर्मोरंट, सर्क, हेरॉन अशा अनेक प्रकारचे पक्षी येथे पाहता येतात. पक्षी पाहण्यासाठी निरीक्षण मनोरेही आहेत. हे ठिकाण सोराबापासून १६ किलोमीटरवर आहे.
हेग्गडू : हे एक प्रसिद्ध सांस्कृतिक कलाकेंद्र आहे. येथे नाट्य, चित्रपट आणि प्रकाशन क्षेत्रात लक्षणीय योगदान देणारी एक सांस्कृतिक संस्था आहे. ‘निनाशम’ म्हणजे नीळकंठेश्वर नाट्य सेवा संघ या नावाने ती प्रसिद्ध आहे. प्रसिद्ध नाटककार के. व्ही. सुब्बाना यांनी ही संस्था स्थापन केली. येथे रंगकर्मी प्रशिक्षण शाळा चालविली जाते. 
हुमचा : हे जैन तीर्थक्षेत्र असून, इ. स. ७००मध्ये जिनादट्टाचार्य यांनी येथे मठ व मंदिराची स्थापना केली. हे ठिकाण शिमोगापासून ५८ किलोमीटरवर आहे. 
अग्रोहेश्वर मंदिर हे येथील वैशिष्ट्य. हे मंदिर चालुक्य व होयसळ शैलीतील असून, अनेक शिल्पकृती येथे आहेत. याचे बांधकाम ग्रॅनाइटमध्ये केले आहे. हे स्थळ शिमोगापासून ७६ किलोमीटर अंतरावर आहे. 
कुडाली : तुंगा आणि भद्रा नद्यांच्या संगमावर हे तीर्थक्षेत्र आहे. जगद्गुरू नरसिंह भारती स्वामीगिरी यांनी येथे मठ व मंदिर उभारले. जवळच रामेश्वर व नरसिंह यांची होयसळ पद्धतीची मंदिरे आहेत. 
