Next
‘स्वरसागरात’ रसिक डुंबले
प्रेस रिलीज
Monday, February 05 | 02:42 PM
15 0 0
Share this story


पिंपरी चिंचवड :  पखवाज आणि तबल्याचा आसमंतामध्ये भरुन राहिलेला दमदार सूर, त्याला लालित्यपूर्ण नृत्याची साथ आणि या संपूर्ण संरचनेचे मर्म उलगडून सांगणारे तालयोगी असा बहारदार त्रिवेणी संगम ‘तालयात्रे’च्या निमित्ताने रसिकांनी अनुभवला. पिंपरी चिंचवड महापालिकेच्यावतीने आयोजित करण्यात आलेल्या एकोणिसाव्या ‘स्वरसागर महोत्सवा’त तालयोगी पं. सुरेश तळवलकर यांनी पंचवीस सहकलाकारांसह सादर केलेल्या बहारदार ‘तालयात्रे’त रसिक तल्लीन झाले. 
 'तालायात्रा' सादर करताना पं. सुरेश तळवलकर
पूर्णानगर येथील शनिमंदिराशेजारील पटांगणावर गुरूवारपासून चार दिवसीय स्वरसागर महोत्सवाला प्रारंभ झाला. शुक्रवारी ज्येष्ठ तबलावादक तालयोगी पं. सुरेश तळवलकर यांनी त्यांच्या संकल्पनेवर आधारित ‘तालयात्रा’ हा एक अनोखा कार्यक्रम सादर केला. यात त्यांच्यासह विविध वादक व नर्तक असे एकूण पंचवीस कलाकार सहभागी झाले होते. 

ताल, लय, गायन आणि नृत्य यांचा अपूर्व संगम असलेल्या या बहारदार प्रस्तुतीची सुरूवात राग हंसध्वनी, ताल धमारातील गणेशस्तुतीने झाली. शिवपरण, गणेशपरण यांचा अद्भुत संगम असलेले पखवाज आणि कथ्थक नृत्यातील तोडे, परण यांनी सजलेले हे वादन व नर्तन रसिकांना मंत्रमुग्ध करुन गेले. 
 
त्यानंतर झपतालातील बिंदादीन महाराजांची ‘शाम छबी अति बध’ ही विख्यात रचना सादर करण्यात आली. यातील लयकारी अवघड असते पण क्लिष्ट नाही, असे याचे वैशिष्ट्य या वेळी सुरेशजींनी समजावून सांगितले. राग सोहनीमधील आडाचौतालातील गानतपस्विनी मोगुबाई कुर्डीकर यांनी रचलेली ‘चलो हटो पिया अब निक ना आओ’ ही अष्टनायिकांपैकी खंडिता ही नायिका प्रस्तुत करणारी देखणी रचना सादर केली. या तालयात्रेचा समारोप ‘आज बस गयी शामजीकी सुरतीया’ या सुंदर रचनेने झाला.   
 
या बहारदार तालयात्रेमध्ये दमदार मृदंग वादन गोविंद भिलारे, ओंकार दळवी, सुजीत लोहोरे, भागवत चव्हाण यांनी केले तर, समर्पक तबलासाथ आशय कुलकर्णी, ईशान परांजपे व सुरेशजींची कन्या आणि शिष्या सावनी तळवलकर - गाडगीळ यांनी केली. 

टाळाची साथ तेजस माजगावकर, केजॉनची साथ उमेश वारभुवन, कलाबाशची साथ  ऋतुराज हिंगे यांनी तर, ड्रम्सची साथ अभिषेक भुरुक यांनी केली. सतार साथ अनिरुद्ध जोशी यांनी व सिंथेसायझर साथ अनय गाडगीळ आणि संवादिनीची अभिषेक शिनकर यांनी केली.

बहारदार गायन विनय रामदासन, नागेश आडगावकर यांनी केले. या नृत्य, वादन व गायन मैफिलीत नृत्यकलाकार अस्मिता ठाकूर, शीतल काळगे, अमृता गोगटे, आयुषी दीक्षित, रजत पवार, गौरी स्वकुळ यांनी लालित्यपूर्ण कथ्थक नृत्ये सादर केली.

 स्वरसागर महोत्सवातील शुक्रवारच्या दुसऱ्या सत्रात ज्येष्ठ बासरीबादक पं. हरिप्रसाद चौरसिया यांचे शिष्य व पुतणे राकेश चौरसिया यांचे सुमधूर बासरीवादन झाले. त्यांनी राग जोगमधील बंदिश या वेळी सादर केली. सुरांशी लीलया खेळत त्यांचे समेवर येणे, वादनातील तयारी पेश करत तबलाच्या साथीने वादन करणे रसिकांना मोहवून गेले. कृष्णाच्या लडिवाळ बासरीचे मंत्रमुग्ध करणारे स्वर त्यांनी आसमंतात भरुन टाकले होते. बासरी वादनाचा शेवट एका पहाडी सुरावटीने केला. कधी संपूच नये असे वाटणाऱ्या या बासरीवादनाला रसिकांनी टाळ्यांच्या कडकडाटात  दाद दिली. राकेशजींना तबल्याची दमदार आणि जोशपूर्ण साथ पं. कालिनाथ मिश्रा यांनी केली. 
 
या वेळी एकनाथ पवार, नगरसेवक विलास मडिगेरी, नगरसेविका अश्विनी बोबडे, योगिता नागरगोजे, महाराष्ट्र प्रदेश कार्यकारिणी सदस्य अमित गोरखे, संयोजक व सहशहर अभियंता प्रवीण तुपे, सहसंयोजक संजय कांबळे, सुरेखा कुलकर्णी आदी मान्यवर उपस्थित होते. 


(स्वरसागर महोत्सवात सादर झालेल्या तालायात्रा कार्यक्रमाचा व्हिडीओ सोबत देत आहोत.)

 
15 0 0
Share this story

Post Your Comment
मराठी English
Your Name *
Email
  Notify me once my comment is published
Comment *
Content limited to 1000 characters,1000 characters remaining.

Select Language
Share Link