Next
मनोहर श्याम जोशी, रॉबर्ट शॉ
BOI
Thursday, August 09 | 03:45 AM
15 0 0
Share this story

‘भारतीय दूरदर्शन सोप ओपेराचे जनक’ असं ज्यांना आदराने म्हटलं जातं, ते मनोहर श्याम जोशी आणि शेक्सपीरियन रंगभूमी व हॉलिवूडचे सिनेमे गाजवणारा अभिनेता रॉबर्ट शॉ यांचा नऊ ऑगस्ट हा जन्मदिन. त्यानिमित्ताने आजच्या ‘दिनमणी’मध्ये त्यांचा अल्प परिचय...
.......
मनोहर श्याम जोशी

नऊ ऑगस्ट १९३३ रोजी अजमेरमध्ये जन्मलेले मनोहर श्याम जोशी हे हिंदी भाषेचे प्रख्यात पत्रकार, लेखक आणि पटकथाकार! त्यांना ‘भारतीय दूरदर्शनच्या सोप ओपेराचे जनक’ म्हटलं जातं कारण ‘हम लोग’ आणि ‘बुनियाद’ या दूरदर्शनवरच्या पहिल्या महामालिका त्यांच्याच सिद्धहस्त लेखणीतून उतरल्या होत्या. भारतीय समाजाचं प्रतिबिंब असणाऱ्या त्या मालिकांनी दर्शकांना अनेक वर्षं बांधून ठेवलं होतं. याशिवाय त्यांनी लिहिलेल्या ‘मुंगेरीलाल के हसीन सपने’, ‘काकाजी कहीन’, ‘हमराही’, ‘जमीन आसमान’, ‘गाथा’ यांसारख्या मालिकाही लोकप्रिय झाल्या होत्या. त्यांची ‘कसप’ ही कादंबरी तर हिंदी भाषेतल्या सर्वोत्तम प्रेमकथांमध्ये अग्रेसर मानली जाते. त्यांनी हे राम, अप्पू राजा, पापा कहते है आणि भ्रष्टाचार यांसारख्या सिनेमांसाठी पटकथा-संवादही लिहिले आहेत. ३० मार्च २००६ रोजी त्यांचा मृत्यू झाला. 
.........

रॉबर्ट शॉ

नऊ ऑगस्ट १९२७ रोजी लॅन्कशरमध्ये जन्मलेला रॉबर्ट शॉ हा शेक्सपीरियन रंगभूमी आणि हॉलिवूडचे सिनेमे गाजवलेला हरहुन्नरी अभिनेता म्हणून ओळखला जातो. इंग्लंडमध्ये असताना मॅक्बेथ, सिम्बेलीन, हेन्री दी एट्थ यांसारखी नाटकं करता करता त्याने अमेरिकेत गेल्यावर हॅरोल्ड पिंटरच्या ‘दी केअरटेकर’मध्ये काम केलं होतं. त्याची सिनेमातली पहिली लक्षात राहणारी भूमिका होती शॉन कॉनरीच्या जेम्स बाँड सिनेमातली ‘फ्रॉम रशिया विथ लव्ह’मधली. पुढे त्याचे - दी लक ऑफ जिंजर कॉफी, बॅटल ऑफ दी बल्ज, ए मॅन फॉर ऑल सीझन्स, दी स्टिंग, जॉज, रॉबिन अँड  मरियन, ब्लॅक संडे, फोर्स टेन फ्रॉम नेव्हरॉन, दी रॉयल हंट ऑफ दी सन - असे सिनेमे गाजले आहेत. २८ ऑगस्ट १९७८ रोजी त्याचा आयर्लंडमध्ये मृत्यू झाला. 
.........
यांचाही आज जन्मदिन :
प्रेमाविषयी अत्यंत हृदयंगम, आर्त भावना व्यक्त करणारे कवी कृ. ब. निकुंब (जन्म : नऊ ऑगस्ट १९२०, मृत्यू : २० जून १९९९)
‘मेरी पॉप्पिन्स’ या अद्भुत दाईची व्यक्तिरेखा निर्माण करणारी लेखिका पी. एल. ट्रॅव्हर्स (जन्म : नऊ ऑगस्ट १८९९, मृत्यू : २३ एप्रिल १९९६) 
यांच्याविषयी अधिक वाचण्यासाठी येथे क्लिक करा. 
कॅप्टन मार्व्हल आणी डेंकालीच्या महाबली वेताळाची (फँटम) भूमिका पडद्यावर अजरामर करणारा अभिनेता टॉम टायलर (जन्म : नऊ ऑगस्ट १९०३, मृत्यू : ३ मे १९५४) 
अफाट लोकप्रिय गायिका, अभिनेत्री व्हिटनी ह्युस्टन (जन्म : नऊ ऑगस्ट १९६३, मृत्यू : ११ फेब्रुवारी २०१२) 

(दररोज प्रसिद्ध होणाऱ्या ‘दिनमणी’ सदरातले स्फुट लेख एकत्रितरीत्या https://goo.gl/QMr7oP या लिंकवर वाचता येतील.)
 
15 0 0
Share this story

Post Your Comment
मराठी English
Your Name *
Email
 
Notify me once my comment is published
Comment *
Content limited to 1000 characters,1000 characters remaining.

Select Language
Share Link