Next
‘जागतिक रॅली सीरिज’साठी संजय सज्ज...
BOI
Friday, August 10 | 06:45 AM
15 0 0
Share this story

संजय टकलेकार रेसिंग, मोटर अॅडव्हेंचर रेसिंग आणि मोटोक्रॉस या थरारक क्रीडा प्रकारात भारताच्या कोणा खेळाडूने देशात वा परदेशात नाव उंचावले... अशी घटना विरळच. परंतु गेल्या काही काळात ही परिस्थिती एका माणसामुळे बदलली आहे. संजय टकले असे या अवलिया रॅली ड्रायव्हरचे नाव.... ‘क्रीडारत्ने’ या साप्ताहिक सदरात आजचा लेख रॅली ड्रायव्हर संजय टकले यांच्याबद्दल...
.....................................
चौदा वर्षांचा मोटोक्रॉस आणि कार रेसिंगचा अनुभव असलेले संजय टकले आता सर्वांत प्रतिष्ठेच्या मानल्या जाणाऱ्या जागतिक रॅली सीरिज स्पर्धेत सहभागी होण्यासाठी सज्ज झाले आहेत. फिनलंडला होणाऱ्या या स्पर्धेत सहभागी होणारे संजय टकले एकमेव भारतीय रॅली ड्रायव्हर आहेत. डब्ल्यूआरसी-३ या विभागात ते सहभागी होणार असून इंग्लंडचे ‘डॅरेन गेरॉड’ हे त्यांचे नेव्हिगेटर असणार आहेत. या स्पर्धेला सर्वाधिक थरारक स्पर्धा समजण्यात येते. कारण भयानक जम्प, धोकादायक वळणे, अत्यंत खडतर ट्रॅक असा प्रवास असतो. कित्येक नावाजलेले स्पर्धक इथे सातत्याने अपयशी ठरले आहेत; मात्र संजय टकलेंचा अनुभव आणि आजवर त्यांनी अशा प्रकारच्या विविध स्पर्धांमध्ये दाखवलेले वर्चस्व त्यांना याही स्पर्धेत यशस्वी करेल असा विश्वास वाटतो.

ही रॅली केवळ पूर्ण करणेही अनेक खेळाडूंना जमत नाही तिथे संजय टकले मात्र ही रॅली जिंकण्यास सज्ज आहेत. शिवाय रॅली पूर्ण करण्याबरोबर या ट्रॅकवर मिळणारा अनुभव आगामी मोसमातील विविध स्पर्धेत उपयुक्त ठरणार आहे. भारताचे नोंदणीकृत रॅली ड्रायव्हर म्हणून त्यांचा अनुभव मोठा आहे.  भारतातील जवळपास प्रत्येक स्पर्धेत ते सहभागी होतात आणि यशही मिळवतात. जागतिक स्तरावर आज त्यांनी स्वतःची एक ओळख निर्माण केली आहे. त्यामुळे फिनलंडमधील रॅली त्यांनी केवळ पूर्ण जरी केली, तरी त्यांची ही कामगिरी अत्यंत महत्त्वपूर्ण समजली जाणार आहे. अर्थात भारताचेही नाव उंचावणार यात शंका नाही आणि त्यांच्या प्रेरणेतून भविष्यात अनेक खेळाडू तयार होतील.

‘एशिया-पॅसिफिक रॅली विजेतेपद स्पर्धे’त रॅलीदरम्यान उजव्या हाताला दुखापत झालेली असतानाही टकले यांनी आपले लक्ष्य पूर्ण करत क्वीन्सलँड येथील ही स्पर्धा जिंकली होती. ही त्यांची जागतिक स्तरावरची सर्वांत अचंबित करणारी कामगिरी ठरली होती. या स्पर्धेनंतर टकले यांनी मलेशियात झालेल्या ‘ए-६ क्लास एशिया-पॅसिफिक रॅली’च्या चौथ्या फेरीतही यश मिळवले. या स्पर्धेतील त्यांचे ‘ए-६ क्लास’मधील हे पहिलेच विजेतेपद ठरले. ही शर्यत त्यांनी तीन तास ४७ मिनिटे आणि ५८.८ सेकंद अशा विक्रमी वेळेत पूर्ण केली. अर्थात ही स्पर्धा जिंकल्यानंतरही त्यांना या मालिकेत झालेल्या काही स्पर्धांमध्ये अपयश आले आणि सर्वसाधारण तिसऱ्या क्रमांकावर त्यांना समाधान मानावे लागले.

मलेशियात झालेल्या ‘एशिया पॅसिफिक सीरिज’च्या मलेशियातील पहिल्या फेरीत संजय टकले व त्यांचे सहकारी मुसा शरीफ यांना दुसऱ्या स्थानावर समाधान मानावे लागले.  संजय टकलेंना ‘प्रोटॉन कॉम्पॅक्ट’ मोटारी जास्त आवडतात. ‘एसयूव्ही’ मोटारींपेक्षा या मोटारी चालवत रेसिंग करण्यात त्यांचा हातखंडा आहे. ‘हिमालयन रॅली’मध्येही त्यांनी याच गाड्या चालवून यश मिळवले होते. मलेशियातील रॅली त्यांना जास्त आव्हानात्मक वाटतात, कारण भारतापेक्षा खडतर ट्रॅक, घनदाट जंगलातून जाणारे आणि अत्यंत उंच-सखल रस्ते, त्यातही चिखलाने भरलेले रस्ते अशा वातावरणात रेस खेळणे अत्यंत आव्हानात्मक असते आणि संजय टकले यांनी आतापर्यंत अशाच आव्हानांचा सामना केला आहे.

हिमालयन रॅलीमध्ये अशाच आव्हानात्मक वातावरणात संजय यांनी विजय मिळवला. या रेसदरम्यान काही क्षण अगदी जीवावर बेतणारे आले होते, परंतु आपल्या अफलातून कौशल्याच्या बळावर त्यांनी यश मिळवले. ब्लॅक आइसचा (चिखलातला बर्फ) अडथळाही त्यांनी पार केला. त्यांनी वयाच्या सोळाव्या वर्षीच मोटोक्रॉसमध्ये सहभाग घेतला होता. त्यानंतर काही वर्षांनी त्यांनी लग्न केले. आता त्यांना एक मुलगी आहे. 

टकले यांना वाळवंटातील रेसिंगचा दांडगा अनुभव आहे. याचबरोबर हिमालयातील शर्यतींचाही मोठा अनुभव आहे. कोणत्या वातावरणात कशा प्रकारे कार चालवायची, त्यावर नियंत्रण ठेवत वेग कसा वाढवायचा याचाही त्यांना प्रदीर्घ अनुभव आहे. आता फिनलंड येथील जागतिक स्पर्धेद्वारे ते सर्वांत खडतर अशा शर्यतीत सहभागी होत आहेत. हा अनुभव त्यांच्यासाठी खूपच महत्त्वाचा ठरणार आहे.

टकले यांची कारकीर्द अशाच खडतर शर्यतींनी आणि आव्हानांनी भरलेली आहे; पण त्यामुळेच देशात त्यांचाही एक चाहता वर्ग निर्माण झाला आहे. आज वयाची चाळिशी पार केलेले टकले यांचा प्रयत्न आहे, तो इतर तरुणांना प्रेरणा देण्याचा व आपले वारसदार निर्माण करण्याचा. आज भारतात अॅडव्हेंचर स्पोर्ट्स लोकप्रिय होत आहेत आणि येत्या काळात टकले यांच्यासारखे अनेक रॅली ड्रायव्हर तयार होतील असा विश्वास वाटतो.

- अमित डोंगरे
ई-मेल: amitdongre10@gmail.com

(लेखक पुण्यातील मुक्त क्रीडा पत्रकार आहेत. ‘क्रीडारत्ने’ या लेखमालिकेतील सर्व लेख एकत्रितरीत्या https://goo.gl/Fot1VH या लिंकवर उपलब्ध आहेत.)
 
15 0 0
Share this story

Post Your Comment
मराठी English
Your Name *
Email
 
Notify me once my comment is published
Comment *
Content limited to 1000 characters,1000 characters remaining.
COMMENTS
धनंजय मदने राष्ट्रीय खेळाडू About 65 Days ago
खुप छान
0
0

Select Language
Share Link