Next
नवविवाहित उच्च मध्यमवर्गीय कुटुंबाचे आर्थिक नियोजन
BOI
Saturday, February 03 | 03:45 PM
15 0 0
Share this story

उच्च मध्यमवर्गीय नवविवाहित कुटुंबाचे आर्थिक नियोजन कसे असावे, याबद्दल एका उदाहरणाच्या साह्याने माहिती घेऊ या... ‘समृद्धीची वाट’ या सदरात...
.............

साहिल व शलाका यांचे एका वर्षापूर्वीच लग्न झाले असून, ते एकत्र कुटुंबात (आई-वडील-बहिण व भाऊ) राहतात. हे एक उच्च मध्यमवर्गीय कुटुंब असून, साहिलचे वडीलही एका बँकेत वरिष्ठ अधिकारी असून, त्यांची अजून चार वर्षे सेवा बाकी आहे. आज आपण साहिल व शलाका यांच्या आर्थिक नियोजनाबाबत चर्चा करू.

त्यांच्याशी चर्चा करताना असे दिसून आले, की त्या दोघांनीही अजून लाइफ इन्शुरन्स पॉलिसी घेतलेली नाही. तसेच सेव्हिंग्ज खात्याव्यतिरिक्त बँकेत ठेव नाही  आणि पीपीएफ, एनपीएस यांसारखी दीर्घकालीन गुंतवणूकही सुरू केलेली नाही. दोघांचाही प्रत्येकी दीड लाख रुपयांचा मेडिक्लेम आहे; मात्र तो त्यांच्या कंपनीमार्फत आहे. दोघांचे वय आणि नोकरीचा कालावधी विचारात घेता त्यांची ‘नेट वर्थ’ निश्चितच चांगली आहे; मात्र नजीकच्या भविष्यकाळात त्यांच्या कौटुंबिक व आर्थिक जबाबदाऱ्या वाढणार आहेत. त्या दृष्टीने त्यांनी आर्थिक नियोजन करणे अत्यंत जरूरीचे आहे.

दोघांच्याही आर्थिक नियोजनात अत्यंत तातडीची व जरूरीची गोष्ट म्हणजे लाइफ इन्शुरन्स कव्हर. त्यांना प्रत्येकी किमान ५० ते ६० लाख रुपयांचे कव्हर असणे जरूरीचे आहे. त्या दृष्टीने टर्म प्लान घेणे योग्य होईल. त्यांचे वय लक्षात घेता ५० ते ६० लाखांच्या टर्म प्लानसाठी प्रति वर्षी प्रत्येकी अंदाजे सहा ते सात हजार रुपये इतका प्रीमियम लागू शकेल. अशा पॉलिसीमुळे पुरेसे कव्हर तर मिळेलच आणि तेही इतक्या कमी प्रीमियममध्ये. सुरुवातीला हे कव्हर त्यांना ३० वर्षे मिळू शकेल. तसेच दर पाच वर्षांनी वाढीव उत्पन्नाच्या प्रमाणात हे कव्हर वयाच्या पन्नाशीपर्यंत वाढवत जावे.

त्यांचे सध्याचे मेडिक्लेम कव्हर हे त्यांच्या कंपनीमार्फत मिळालेले असल्याने ते सध्याच्या कंपनीत असेपर्यंतच राहील. त्या दृष्टीने दोघांनी किमान तीन लाखांचे फ्लोटिंग कव्हर घेणे योग्य होईल. वाढत्या वयानुसार हे कव्हर दर पाच वर्षांनी किमान एक ते दोन लाखांनी वाढवावे. या दोन्ही पॉलिसींमुळे त्यांचा वार्षिक अंदाजे ३५ हजार रुपये म्हणजे दरमहा सुमारे तीन हजार रुपये इतका खर्च होईल. 

दोघांच्याही नोकरीत पेन्शन सुविधा नाही. त्यामुळे त्याबाबतची तरतूद शक्य तितक्या लवकर करणे योग्य होईल. त्या दृष्टीने एनपीएस व ‘पीपीएफ’मध्ये नियमित गुंतवणूक करणे योग्य होईल. साधारणपणे दरमहा सात ते आठ हजार रुपये इतकी गुंतवणूकयात करणे योग्य होईल. या प्रमाणे इन्शुरन्स व रिटायरमेंटसाठीचे नियोजन केल्यावर अन्य गुंतवणुकीचा विचार करावा.

सध्या मासिक शिल्लक ३४ हजार रुपये असली, तरी नजीकच्या भविष्यात खर्च वाढणार असून, इतकी शिल्लक राहणे काहीसे अवघड होऊ शकते; मात्र दोघांच्याही पगारात दर वर्षी होणारी वाढ विचारात घेता इन्शुरन्स व रिटायरमेंटसाठी वरील प्रमाणे गुंतवणूक करूनही दरमहा दहा हजार रुपये इतकी गुंतवणूक करणे शक्य होईल. ही गुंतवणूक सुरुवातीला एसआयपी स्वरूपात म्युच्युअल फंडांत करावी.

इमर्जन्सी खर्चाच्या दृष्टीने किमान अडीच ते तीन लाख रुपये बँकेत एफडी स्वरूपात ठेवणे योग्य होईल. यापुढे रिअल इस्टेटमध्ये गुंतवणूक शक्यतो टाळावी. कारण त्यांच्या सध्याच्या एकूण गुंतवणुकीत सुमारे ८५ टक्के गुंतवणूक रिअल इस्टेटमध्ये असून, सुमारे ११ टक्के गुंतवणूक सोने व चांदीत आहे. अन्य गुंतवणूक केवळ चार ते पाच टक्के इतकीच आहे. गुंतवणुकीत विविधता असणे जरूरीचे असते आणि म्हणूनच या जोडप्याने यापुढील गुंतवणूक जाणीवपूर्वक डेट व इक्विटी फंडांमध्ये करणे योग्य होईल. 

- सुधाकर कुलकर्णी 
(लेखक पुण्यातील सर्टिफाइड फायनान्शियल प्लॅनर आहेत.)

(शेअर बाजार, तसेच म्युच्युअल फंडातील गुंतवणूक जोखीमपूर्ण आहे. ‘समृद्धीची वाट’ या सदराचा उद्देश वाचकांना गुंतवणुकीसंदर्भातील अशा विविध बाबींची माहिती करून देऊन दिशा दाखवणे हा आहे. कोणत्याही प्रकारची गुंतवणूक करताना वाचकांनी स्वतःच्या जबाबदारीवरच करावी. त्यासाठी ‘बाइट्स ऑफ इंडिया’ कोणत्याही प्रकारे जबाबदार नसेल. वाचकांनी गुंतवणुकीसंदर्भातील आपल्या शंका, प्रश्न article@bytesofindia.com या ई-मेलवर पाठवावेत. निवडक प्रश्नांना या सदरातून उत्तरे दिली जातील. हे सदर दर शनिवारी आणि रविवारी प्रसिद्ध होते. त्यातील लेख एकत्रितरीत्या https://goo.gl/Vb1kM6 या लिंकवर उपलब्ध असतील.)
 
15 0 0
Share this story

Post Your Comment
मराठी English
Your Name *
Email
  Notify me once my comment is published
Comment *
Content limited to 1000 characters,1000 characters remaining.

Select Language
Share Link