Next
‘अवयवदान हे महान कार्य’
प्रेस रिलीज
Tuesday, April 17 | 04:00 PM
15 0 0
Share this story

अवयवदातांचे कुटुंबीय व अवयव दानप्रक्रियेमध्ये सहभागी होणार्‍या व्यक्तींचा सत्कार करताना डॉ.कपिल झिरपे, वैद्यकीय सेवेचे संचालक डॉ.संजय पठारे, अभिनेता अतुल परचुरे, पुण्याच्या वाहतूक विभागाचे उपायुक्त अशोक मोराळे आणि रूबी हॉल क्लिनिकचे मुख्य कार्यकारी अ

पुणे : ‘​​जिवंतपणे चांगले काम करू शकलो नाही, तरी मरताना किती मोठे कार्य करण्याची शक्यता असते हे अवयवदानामुळे सिद्ध होते’,​​ असे मत प्रसिध्द अभिनेते अतुल परचुरे यांनी व्यक्त केले. अवयवदान हे सक्तीचे करणे आवश्यक असल्याचेही त्यांनी यावेळी सांगितले.

रूबी हॉल क्लिनिकतर्फे बालगंधर्व रंगमंदिर येथे आयोजित ‘ऑर्गन डोनर डे’चे औचित्य साधून अवयवदातांचे कुटुंबीय व अवयव दानप्रक्रियेमध्ये सहभागी होणार्‍या व्यक्तींचा सत्कार करण्यात आला. त्यावेळी ते बोलत होते. या कार्यक्रमाचे आयोजन इंडियन मेडिकल असोसिएशन पुणे, रिबर्थ, लायन्स क्लब्स इंटरनॅशनल व होप अँड केअर फाउंडेशन यांच्या सहकार्याने करण्यात आले होते.

रूबी हॉल क्लिनिकतर्फे ‘ऑर्गन डोनर डे’चे औचित्य साधून अवयवदानाबाबत जागरूकता निर्माण करण्यासाठी शनिवारवाडा ते बालगंधर्वदरम्यान काढण्यात आलेल्या अम्ब्रेला रॅलीत सहभागी नागरिक.या वेळी अवयवदानाबाबत जागरूकता निर्माण करण्यासाठी शनिवारवाडा ते बालगंधर्व रंगमंदिरदरम्यान अम्ब्रेला रॅलीचे आयोजन करण्यात आले होते. यात प्रमुख पाहुणे म्हणून अभिनेता अतुल परचुरे, पुणे वाहतूक विभागाचे उपायुक्त अशोक मोराळे यांसह ‘रूबी’चे मुख्य कार्यकारी अधिकारी बोमी भोट, वैद्यकीय सेवेचे संचालक डॉ. संजय पठारे, डॉ. कपिल झिरपे, डॉ. जगदीश हिरेमठ, डॉ. अभय सदरे, डॉ. अभय हुपरीकर, डॉ. शीतल धडफळे आणि वैद्यकीय सामाजिक कार्यकर्त्या सुरेखा जोशी, सिध्दार्थ गांधी, लायन चंद्रहास शेट्टी, पद्मा अय्यर, श्रध्दा गणेरीवाला, राधा खांदोडे, सक्षम जेष्ठत्व, बंडोपंथ फडके, डॉ.सुभाष देसाई आदी मान्यवर उपस्थित होते.

परचुरे म्हणाले की, ‘अवयवदानाबद्दल मलाही पूर्ण ज्ञान नव्हते. आज या कार्यक्रमाला आल्यानंतर मला याचे महत्त्व कळले. परदेशात अवयवदानाचे प्रमाण हे जास्त असून, त्या तुलनेत भारतातील प्रमाण अत्यल्प आहे, अशी माहिती येथे उपस्थित डॉक्टरांकडून मिळाली. अवयवदानाचे महत्त्व लोकांपर्यंत पोहचावे यासाठी आपण स्वत: प्रचार व प्रसार करणार असून, प्रत्येकाने या कार्यात सहभागी व्हावे.’ या वेळी परचुरे यांनी स्वत: अवयवदानाचा फॉर्म भरला.

मोराळे म्हणाले, ‘अवयवदानाच्या प्रक्रियेत ग्रीन कॉरिडॉरच्या माध्यमातून आमचा सहभाग असतो व या महान कार्यामध्ये आमचा हातभार आहे, याचा आम्हाला अभिमान आहे. बर्‍याच वेळा आम्ही भावनिक प्रसंग अगदी जवळून पाहतो; पण या भावनिक प्रसंगातून बाहेर पडून जे महान कार्य अवयवदात्यांचे कुटुंबीय करतात ते खरोखरच महान आहेत. पुणे विमानतळ ते ‘रूबी हॉल’ दरम्यान तयार करण्यात आलेल्या ग्रीन कॉरिडॉरमध्ये मी ही सहभागी होतो. आतापर्यंत प्रत्येक वेळेस हे अंतर साधारण सहा मिनिटांत पार केले गेले आहे. जेव्हा आम्ही ग्रीन कॉरिडॉरबाबत लोकांना सांगतो तेव्हा ते अक्षरश: त्यांच्या जागेवर थांबतात आणि आपला हातभार लावतात. गेल्या १० महिन्यांत २२ ग्रीन कॉरिडॉर तयार करण्यात आले व ते पूर्णपणे यशस्वी झाले या प्रक्रियेत आमचा सहभाग आहे, याचा आम्हाला आनंद आहे.’

प्रेरणा चंदनशिवे या हदयप्रत्यारोपण झालेल्या मुलीने नृत्य सादर केले; तसेच रविकांत ठोके, मिलिंद रहाळकर, शार्दुल सावंत, अथर्व देशपांडे या अनुक्रमे हदय, यकृत, मुत्रपिंड, कॉर्निया प्रत्यारोपण झालेल्या रूग्णांनी मनोगत व्यक्त केले; तसेच नीलेश गायकवाड या अवयवदान केलेल्या युवकाचा भाऊ विकास गायकवाड याने आपले मनोगत व्यक्त केले. नीलेश गायकवाड यांचे हात ही दान करण्यात आले होते, हे महाराष्ट्रात प्रथमच घडले होते. कार्यक्रमाचे सूत्रसंचालन राजेश दामले यांनी केले.
 
15 0 0
Share this story

Post Your Comment
मराठी English
Your Name *
Email
  Notify me once my comment is published
Comment *
Content limited to 1000 characters,1000 characters remaining.

Select Language
Share Link