पालघर : कुपोषण निर्मूलनासाठी व बालमृत्यू रोखण्यासाठी पालघर जिल्हा परिषदेमार्फत वैद्यकीय अधिकारी आणि सहायक परिचारिका प्रसाविका (ANM) या पदांसाठी आरोग्य विभागामार्फत मुलाखती घेण्यात आल्या आहेत. पालघर जिल्हा परिषदेच्या जनसंपर्क अधिकारी मनीषा निरभवणे यांनी ही माहिती दिली आहे.
जिल्ह्यात पावसाळ्या नंतर येणारे आजारपण आणि त्यानंतर ओढवणारे बालमृत्यू यांवर निर्बंध आणण्यासाठी जिल्हा सेस फंडातून या नियुक्त्या ३१ मार्च २०१८पर्यंत करण्यात येणार आहेत. यात वैद्यकीय अधिकाऱ्यांची सात पदे आणि सहायक परिचारिका प्रसाविका (ANM) अशी १५ पदे भरण्यात येणार आहेत. जिल्ह्यातील कुपोषणाचे दुष्टचक्र मोडीत काढून जनसामान्यांना आरोग्याच्या योग्य सोयीसुविधा मिळाव्यात व बालमृत्यूंना आळा घालण्याकरिता पालघर जिल्हा परिषदे मार्फत सर्व आवश्यक पावले उचलण्यात येतील, असे प्रतिपादन पालघर जिल्हा परिषदेच्या अध्यक्षा सुरेखा थेतले यांनी केले. पावसाळ्यापूर्वी योग्य उपयोजना करून कुपोषणाची लढाई सर्वांनी एकत्र येऊन लढल्यास यावर मात करणे अवघड जाणार नाही, असे मत मुख्य कार्यकारी अधिकाऱ्यांनी व्यक्त केले.