नंदुरबार : दोन वेळच्या जेवणाची भ्रांत असलेल्या आदिवासी कुटुंबात जन्मलेल्या चुनीलाल पावराने कबड्डीतील प्रावीण्याच्या बळावर राष्ट्रीय पातळीवरील प्रो कबड्डी लीगमध्ये निवड होण्यापर्यंत मजल मारली आहे. त्याच्या रूपाने देशाला एक प्रतिभावान राष्ट्रीय कबड्डीपटू मिळाला आहे. दुर्गम आदिवासी भागात राहून,अत्यंत प्रतिकूल परिस्थितीशी तोंड देत त्याने घेतलेली ही गरुडझेप अचंबित करणारी आहे.
नंदुरबारच्या शिरपूर तालुक्यातील कनगई या दुर्गम आदिवासी गावात शिवलाल व गारीबाई या शेतमजूर दाम्पत्याच्या पोटी एक जुलै १९९७रोजी चुनीलालचा जन्म झाला. दोन भाऊ, दोन बहिणी यांच्यासह प्रतिकूल परिस्थितीला तोंड देत, त्याचे पहिली ते दहावीपर्यंतचे शिक्षण वाघाडी येथील आश्रमशाळेत झाले.
गरिबीशी दोन हात करत शालेय शिक्षण सुरू असतानाच त्याला कबड्डीचे वेड लागले. त्याच्या आई-वडिलांनीही त्याला प्रोत्साहन दिले. परिस्थितीमुळे हताश न होता, जिद्द आणि कठोर मेहनतीच्या जोरावर त्याने कबड्डीतील बारकावे समजून घेतले. आपला खेळ प्रभावी, अचूक करण्याकडे लक्ष दिले. राज्य आणि राष्ट्रीय स्तरावरील विविध मानाच्या कबड्डी स्पर्धांमध्ये भाग घेऊन त्याने आपल्या खेळाने सर्वांचे लक्ष वेधून घेतले.
हे करताना शिक्षणही सुरू होते. आर. सी. पटेल फार्मसी कॉलेजमधून त्याने डी. फार्म. पूर्ण केले. आपल्या उत्तम खेळाच्या जोरावर त्याने स्वतःचेच नव्हे, तर आई-वडील, समाज आणि शिरपूर तालुक्याचे नावही राष्ट्रीय स्तरावर पोहोचवले.
२०१७मध्ये ‘जस्ट कबड्डी सीझन-४’मध्ये त्याने गुजरात वॉरियर्स संघाकडून खेळताना दमदार खेळ करून संघाला विजेतेपद मिळवून दिले. यामुळे देशातील नामवंत प्रशिक्षकांचेही त्याच्याकडे लक्ष गेले. २०१८मध्ये ‘जस्ट कबड्डी सीझन-५’मध्ये तो ‘दिल्ली दमदार’ संघाकडून खेळला आणि त्याने संघाला सुवर्णपदक मिळवून दिले. त्याच्या या कामगिरीची दखल घेऊन त्याची प्रो कबड्डी लीगमध्ये निवड झाली आहे.
या युवा, प्रतिभावान, मेहनती आदिवासी कबड्डीपटूला साहित्य अथवा इतर खर्चाची जुळवाजुळव करताना अनंत अडचणी येतात. तसेच त्याचा अंगभूत खेळ आणखी खुलण्यासाठी त्याला उत्तम राष्ट्रीय प्रशिक्षकाचीही नितांत आवश्यकता आहे. त्याला योग्य मार्गदर्शन मिळाले, तर येत्या काळात ऑलिंम्पिकसारख्या जागतिक स्पर्धेतही चुनीलाल देशाचे नाव नक्कीच झळकवेल यात शंका नाही.
