पालघर : हत्तीरोग निर्मूलनासाठी महाराष्ट्रातील १७ जिल्ह्यांमध्ये सामुदायिक औषधोपचार मोहीम २६ जुलै ते ३० जुलै या कालावधीत राबविण्यात येणार आहे. या संदर्भात पालघर येथे २० जुलै रोजी जिल्हा समन्वय समितीची बैठक मुख्य कार्यकारी अधिकारी निधी चौधरी यांच्यामार्फत घेण्यात आली. यात या मोहिमेतील नियोजनाचा आढावा घेण्यात आला.
पालघर जिल्ह्यातील ग्रामीण वसई, पालघर, डहाणू, वाडा, विक्रमगड तालुक्यात, तसेच पालघर, डहाणू नगरपालिका आणि संपूर्ण वसई, विरार महानगरपालिका क्षेत्रात ही मोहीम राबविण्यात येणार आहे. निवडलेल्या सर्व लाभार्थ्यांना (गरोदर माता, दोन वर्षांखालील बालके व गंभीर रुग्ण वगळून) वयोगटानुसार डीईसी गोळ्यांची एक मात्रा द्यायची आहे.
प्रत्येक ठिकाणी गोळ्यावाटप करण्यासाठी प्रशिक्षित कर्मचाऱ्याची नियुक्ती करण्यात आली असून, त्यांच्या समक्ष सर्वांनी औषधोपचार घेणे आवश्यक आहे, असे आवाहन जिल्हा परिषद अध्यक्षा सुरेखा थेतले यांनी केले. तसेच या मोहिमेत सर्व पदाधिकारी, अधिकारी आणि कर्मचारी यांनी पुढाकार घेऊन हा औषधोपचार घेण्यास प्रवृत्त करावे, असे आवाहन मुख्य कार्यकारी अधिकारी निधी चौधरी यांनी केले.
हत्तीरोग ही एक जागतिक समस्या आहे. जगातील ८० देशांतील १२ कोटींपेक्षा जास्त जणांना या रोगाची लागण झाली आहे. त्यापैकी एक तृतीयांश रुग्ण भारतात आढळतात. हिवताप, डेंग्यू, चिकनगुनिया, आदी रोगांप्रमाणे हत्तीरोगाचा उद्रेक होत नाही अथवा त्यामुळे मृत्यू होत नाहीत. परंतु या रोगामुळे मोठ्या प्रमाणात सामाजिक व आर्थिक समस्या निर्माण होतात.
हत्तीरोगबाधित माणसाच्या शरीरातील प्रौढ हत्तीरोग परजीवी लाखोंच्या संख्येने मायक्रोफायलेरियांना जन्म देतात. हे मायक्रोफायलेरिया रक्ताभिसरणाद्वारे रक्तामध्ये पसरतात. क्युकिफेसियटस डास हत्तीरोगबाधित व्यक्तीला चावतो. त्या वेळी बाधित माणसांच्या शरीरातील मायक्रोफायलेरिया डासांच्या सोंडेद्वारे त्याच्या शरीरात प्रवेश करतात. डासांच्या शरीरात साधारणतः १२ दिवसांत दूषित अळ्या तयार होतात. हे डास दुसऱ्या निरोगी व्यक्तीला चावल्यास त्या व्यक्तीला हत्तीरोगाची बाधा होते. बाधित व्यक्तीमध्ये ताप किंवा तत्सम लक्षणे आदळतात.
यावर डीईसी व अल्बेंडेझोल ४०० एमजी ही दोन्ही औषधे पूर्णतः सुरक्षित आहेत. डीईसी गोळ्या मायक्रोफायलेरियाचा नाश करतात, तर अल्बेंडेझोल ४०० एमजी गोळी आतड्यातील कृमींचा नाश करते. दोन्ही गोळ्यांचे एकाच वेळी सेवन केले, तर प्रौढ जंतूंचा नाश होऊन हत्तीरोगाचा प्रसार रोखण्यास मदत होईल; मात्र डीईसी व अल्बेंडेझोल ४०० एमजी ही दोन्ही औषधे उपाशीपोटी देऊ नयेत, अशी सूचना या वेळी देण्यात आली.