पुणे : जिल्हा क्रीडा अधिकारी व जिल्हा क्रीडा संकुलाच्या वतीने बालेवाडी येथील श्री शिवछत्रपती क्रीडानगरीमध्ये आयोजित केलेल्या १७ वर्षांखालील जिम्नॅस्टिक्स स्पर्धेत सूर्यदत्ता ज्युनिअर कॉलेजच्या श्रावणी पेंडसे हिने प्रथम, तर अनुश्री कुलकर्णी हिने द्वितीय क्रमांक पटकावला.
विभागीय स्तरावर मिळवलेल्या या यशानंतर आता श्रावणी आणि अनुश्री राज्यस्तरीय स्पर्धेत पुणे जिल्ह्याचे प्रतिनिधित्व करणार आहेत. राज्यस्तरीय स्पर्धा २३ ते २७ ऑक्टोबर २०१९ या कालावधीत औरंगाबाद येथे होणार आहेत. या दोघीही अकरावी कला शाखेत शिकत आहेत. त्यांच्या या यशाबद्दल सूर्यदत्ता ग्रुप ऑफ इन्स्टिट्यूटच्या वतीने दोघींचे अभिनंदन करण्यात आले व पुढील स्पर्धेसाठी त्यांना शुभेच्छा देण्यात आल्या.
या वेळी बोलताना सूर्यदत्ता संस्थेचे संस्थापक अध्यक्ष डॉ. संजय चोरडिया म्हणाले, ‘विविध क्रीडा स्पर्धांमध्ये सूर्यदत्ता संस्थेतील विद्यार्थी सातत्याने उल्लेखनीय कामगिरी करत आहेत. या सगळ्या खेळाडूंना प्रोत्साहित करण्यासाठी वर्धापनदिनाच्या कार्यक्रमात त्यांचा सत्कार करण्यात येणार आहे. खेळामुळे मानसिक व शारीरिक आरोग्य उत्तम राहते. सामाजिक भान, सांघिक भावना, नेतृत्व, सहनशीलता आदी गोष्टी मुलांना त्यातून आत्मसात करता येतात. शिस्तीच्या सवयींबरोबरच त्यांना अपयशातून यश मिळवण्याचा विश्वास मिळतो. त्यामुळे ‘सूर्यदत्ता’मध्ये खेळांनाही तितकेच महत्त्व दिले जाते.’
