पुणे : सांगली आणि कोल्हापूर जिल्ह्यांतील पूरग्रस्तांसाठी मदतीचा हात म्हणून ईगल एज्युकेशन सोसायटीच्या युनिक इंग्लिश मीडियम स्कूल अँड ज्युनिअर कॉलेजतर्फे जीवनावश्यक वस्तूंची मदत पाठवण्यात आली. धान्य, कपडे, टिकाऊ कोरडे खाद्यपदार्थ, चादर, शाल, रग, स्वेटर आदींचा यात समावेश होता.
रविवारी, २५ ऑगस्ट रोजी ही मदत शाळेच्या वाहनांमधून सांगली आणि कोल्हापूरकडे रवाना करण्यात आली. संस्थेचे संस्थापक अध्यक्ष डॉ. आर. ए. मुलाणी, प्राचार्य जयश्री जाधव, उपप्राचार्य सुनिता चांदगुडे व संस्थेच्या पदाधिकारी डॉ. तस्नीम मुलाणी यांच्या मार्गदर्शनाखाली शिक्षक, कर्मचारी, पालकवर्ग व विद्यार्थी यांनी या उपक्रमात उस्फूर्तपणे सहभाग घेतला.