पुणे : किर्लोस्कर ऑईल इंजिन्स लिमिटेड कंपनीला यंदाचा ‘सीआयआय एक्झिम बँक सर्वोत्कृष्ट व्यवसाय’ पुरस्कार मिळाला आहे. हा पुरस्कार पटकावणारी डीझेल इंजिन, जनरेटर्स क्षेत्रातील ही पहिली कंपनी आहे. बेंगळुरू इथं नुकत्याच झालेल्या २७ व्या राष्ट्रीय गुणवत्ता परिषदेत ‘केओइएल’चे व्यवस्थापकीय संचालक आणि मुख्य कार्यकारी अधिकारी आर. आर. देशपांडे यांनी एक्झिम बँकेचे व्यवस्थापकीय संचालक आणि मुख्य कार्यकारी अधिकारी डेव्हिड रस्किन्हा यांच्या हस्ते हा पुरस्कार स्वीकारला.
नेतृत्व, धोरण, भागीदारी, ग्राहक केंद्री प्रक्रिया, कार्यक्षमता, अशा विविध निकषांवर कंपनीची या पुरस्कारासाठी निवड करण्यात आली आहे. ‘किर्लोस्कर ऑईल इंजिन्स लिमिटेड’ अर्थात ‘केओइएल’ने व्यवसाय वृद्धी, विक्री वाढ आणि खेळत्या भांडवलात घट, तसेच निर्मिती प्रकल्पाच्या आणि यांत्रिक क्षमतेचा योग्य वापर करण्यावर भर देत व्यवसायात प्रगती केली आहे. त्याचवेळी सामाजिक जबाबदारी म्हणून उद्योग समूहाच्या तत्त्वांशी साधर्म्य राखत विविध उपक्रम राबवले आहेत. ज्याचा समाजाला फायदा झाला आहे. त्यामुळे या पुरस्कारासाठी तिची निवड केल्याचे या वेळी नमूद करण्यात आले.
भारतीय उद्योग महासंघ (सीआयआय) आणि एक्स्पोर्ट-इंपोर्ट बँक ऑफ इंडिया (एक्झिम बँक) यांनी १९९४ पासून संयुक्तपणे व्यावसायिक गुणवत्तेसाठी हे पुरस्कार देण्यास सुरुवात केली. भारतीय उद्योग क्षेत्रात एक मानाचा पुरस्कार म्हणून हा पुरस्कार ओळखला जातो. युरोपियन फाउंडेशन ऑफ क्वालिटी मॅनेजमेंटच्या धर्तीवर आधारीत अत्यंत कठोर निवड प्रक्रिया या पुरस्कारासाठी अवलंबली जाते.
या पुरस्काराला उत्तर देताना ‘केओइएल’चे व्यवस्थापकीय संचालक आणि मुख्य कार्यकारी अधिकारी आर. आर. देशपांडे म्हणाले, ‘‘केओइएल’च्या सन्मानात भर घालणारा हा पुरस्कार आहे. सीआयआय आणि एक्झिम बँकेचा मी आभारी आहे. हा पुरस्कार म्हणजे आमच्या उत्कृष्टतेसाठी असलेल्या कटीबद्धतेला मिळालेली पोचपावती आहे. सतत उत्तमतेचे नवनवीन मापदंड निर्माण करणे हे ‘केओइएल’चे उद्दिष्ट आहे. सध्याच्या अत्यंत स्पर्धात्मक वातावरणात सर्वोत्कृष्ट उत्पादन निर्माण करणे हे कठीण आहे, पण तीच गुणवत्ता कायम राखणे हे त्याहूनही कठीण आहे. सर्वोत्कृष्टतेच्या या प्रवासात हे मापदंड सातत्याने उंचावत जावेत हाच आमचा अथक प्रयत्न आहे.’
