कोल्हापूर : ‘ब्रिटीशांच्या गुलामीतून मुक्त होऊन भारतीय स्वातंत्र्याला आज ७० वर्षे झाली. आपल्या देशाचे स्वातंत्र्य अबाधित राहण्यासाठी सर्व युवकांनी राष्ट्रभावनेने प्रेरित होऊन समाजकार्यात उतरले पाहिजे व या देशाला प्रगतीपथाकडे नेले पाहिजे.’ असे विचार स्वामी विवेकानंद शिक्षण संस्थेचे कार्याध्यक्ष प्राचार्य अभयकुमार साळुंखे यांनी व्यक्त केले.
स्वातंत्र्यदिनाच्या ७१ व्या ध्वजारोहण प्रसंगी प्रमुख पाहुणे म्हणून ते बोलत होते. या वेळी संस्थेच्या प्राचार्या शुभांगी गावडे, तसेच महाविद्यालयाचे प्राचार्य डॉ. एम. वाय. होनगेकर उपस्थित होते.
प्राचार्य अभयकुमार साळुंखे यांनी भाषणातून भारतीय स्वातंत्र्यासंबंधी अनेक ऐतिहासिक प्रसंग कथन केले. ‘अनेक क्रांतिकारकांच्या हौतात्त्म्यावर देशाला स्वातंत्र्य प्राप्त झाले आहे. तसेच या देशातील थोर शास्त्रज्ञ, विचारवंतांनी देशाला महासत्तेकडे नेण्यासाठी आपले सर्वस्व वाहिले आहे. अनेक शिक्षणमहर्षीनी देशात शिक्षणाचा प्रसार करुन समाज व देशाला प्रगतीपथावर नेले आहे. विवेकानंद शिक्षण संस्था सर्वधर्म समभाव व मानवतावादी विचाराने शैक्षणिक कार्य करत आहे,’ असे विचार त्यांनी व्यक्त केले.
या वेळी एन.सी.सीच्या विद्यार्थ्यांनी शानदार परेड व कमांडो प्रात्यक्षिक सादर केले. पुणे येथे झालेल्या राष्ट्रीय जलतरण स्पर्धेत यश प्राप्त केल्याबद्दल अहिल्या सचिन चव्हाण हिचा सत्कार करण्यात आला. स्वातंत्र्यदिनाचे औचित्य साधून प्राचार्य अभयकुमार साळुंखे यांच्या हस्ते महाविद्यालयातील सेट परीक्षा उत्तीर्ण, पुस्तक लेखक व सेवानिवृत्त प्राध्यापकांचा सत्कार करण्यात आला. या वेळी प्रा. एम. आर. पाटील, डॉ. ए. एस. महात यांनी आपले मनोगत व्यक्त केले.
या कार्यक्रमाचे संयोजन जिमखाना प्रमुख प्रा. किरण पाटील, प्रा. एस. जी. गावंडे, प्रा. एस. एम. भोसले, प्रा. एस. एस. कुंडले, रजिस्ट्रार सी. बी. दोडमणी, रवी चौगुले व सहकाऱ्यांनी केले. कार्यक्रमाचे सूत्रसंचालन प्रा. किरण पाटील यांनी केले. या ध्वजारोहण समारंभासाठी संस्था परिवारातील डॉ. बापूजी साळुंखे इंजि.कॉलेजचे प्राचार्य आर. जी. पाटील, डॉ. बापूजी साळुंखे हॉटेल मॅनेजमेंट इन्स्टि.चे प्राचार्य धनराज भोसले, सावित्रीबाई फुले नर्सिंग कॉलेज प्रमुख, संस्था कार्यालयातील कर्मचारी, प्राध्यापक व प्रशासकीय कर्मचारी, विद्यार्थी, विद्यार्थिनी, पालक बहुसंख्येने उपस्थित होते.
या कार्यक्रमाचे प्रास्ताविक प्राचार्य डॉ. एस. वाय. होनगेकर यांनी केले तर आभार डॉ. डी. बी. पाटील यांनी मानले. सूत्रसंचालन प्रा. डॉ. प्रभावती पाटील व प्रा. समिक्षा पाटील यांनी केले.
