जग व्यापून टाकलेल्या करोनाला प्रतिकार करण्यासाठी लसी विकसित करण्याचे संशोधनकार्य अनेक देशांमध्ये सुरू असून, अनेक कंपन्या आणि सरकारी यंत्रणा त्यात कार्यरत आहेत. भारतासह अनेक देशांमध्ये लसीच्या चाचण्या सुरू आहेत. चाचण्या पूर्ण झाल्यानंतर आता ब्रिटनने सामान्य नागरिकांच्या लसीकरणाचा टप्पा आठ डिसेंबरला सुरू केला असून, फायझर आणि बायोएनटेक या संस्थांनी विकसित केलेली लस नागरिकांना दिली जात आहे. मार्गारेट कीनन या आजी फायझरची कोविड-१९ प्रतिबंधक लस घेणाऱ्या जगातल्या पहिल्या व्यक्ती ठरल्या आहेत. पुढच्या आठवड्यात त्यांना ९१ वर्षे पूर्ण होत असून, वाढदिवसाची ही सर्वोत्तम भेट असल्याचे त्यांनी म्हटले आहे.
मध्य इंग्लंडमधील कॉव्हेंट्री येथील स्थानिक हॉस्पिटलमध्ये मार्गारेट आजींनी आठ डिसेंबर रोजी सकाळी साडेसहा वाजता ही लस घेतली. चाचण्यांनंतर नागरिकांना लसीकरण सुरू करणारा ब्रिटन हा पहिला पाश्चिमात्य देश ठरला आहे.
‘कोविड-१९ची लस घेणारी पहिली व्यक्ती बनण्याचा मान मिळाल्यामुळे मला खूप खास वाटते आहे. वाढदिवसाआधी मिळालेली ही सर्वोत्तम भेट आहे. गेल्या जवळपास वर्षभराचा काळ मला एकट्याला राहावे लागत होते. आता लस घेतल्यामुळे नव्या वर्षात मी माझे कुटुंबीय आणि मित्रमंडळींसोबत वेळ घालवू शकेन,’ अशा भावना मार्गारेट आजींनी व्यक्त केल्या. ज्वेलरी दुकानात सहायक म्हणून काम करणाऱ्या या आजी चार वर्षांपूर्वी निवृत्त झाल्या आहेत. त्यांना एक मुलगी, एक मुलगा आणि चार नातवंडे आहेत.
फोटोग्राफर्स आणि टीव्ही प्रतिनिधींच्या उपस्थितीत मार्गारेट आजींना मे पार्सन्स नावाच्या नर्सने लस दिली.
ब्रिटन हा युरोपातील करोनाचा सर्वाधिक फटका बसलेला देश आहे. तेथे ६१ हजारांहून अधिक जणांचा करोनामुळे मृत्यू झाला. आता मात्र करोनावर मात करण्याचा विश्वास पंतप्रधान बोरिस जॉन्सन यांना वाटतो आहे. फायझर-बायोएनटेकच्या लसीचे लसीकरण करण्याचा निर्णय अमेरिका आणि युरोपीयन युनियनच्या आधी ब्रिटनने घेतला आहे. लसीकरण कार्यक्रम सुरू झालेला पाहता भावुक झाल्याची प्रतिक्रिया ब्रिटनचे आरोग्य सचिव मॅट हॅनकॉक आणि वैद्यकीय संचालकांनी दिली आहे.
पहिल्या टप्प्यात ब्रिटनने फायझर-बायोएनटेकच्या चार कोटी लसींची मागणी नोंदवली आहे. प्रत्येक व्यक्तीला दोन लसी लागणार असल्याने या लसी दोन कोटी नागरिकांना पुरतील. ब्रिटनची लोकसंख्या ६.७ कोटी आहे.