पुणे : ‘आजच्या धावपळीच्या जगात आपले आरोग्य चांगले राहणे क्रमप्राप्त आहे. बैठे काम, वेळी-अवेळी जेवण, व्यायामाचा अभाव, फास्टफूड-जंकफूडचे सेवन, तंत्रज्ञानाच्या आहारी जाणे अशा विविध गोष्टीमुळे आपल्याला अनेक आजारांचा सामना करावा लागतो. त्यावर उपचार करण्यासाठी हजारो रुपये खर्च होतात. शिवाय वेळ जातो आणि मानसिक त्रासही सहन करावा लागतो. त्यामुळे उपचारांपेक्षा प्रतिबंध चांगला हे लक्षात घेऊन आपण नियमित व्यायाम, योग्य आहार आणि अधूनमधून आरोग्य तपासण्या करणे गरजेचे आहे,’ असे मत डिव्हाइन कॉज सोशल फाउंडेशनच्या प्रीती जोसेफ यांनी व्यक्त केले.
सूर्यदत्ता इन्स्टिट्यूट ऑफ हेल्थ सायन्सेस यांच्या वतीने ‘सूर्यदत्ता एज्यु-सोशियो कनेक्ट’ अंतर्गत बावधन कॅम्पसमध्ये आयोजित मोफत आरोग्य तपासणी शिबिराच्या निमित्ताने त्या बोलत होत्या. शिबिरावेळी डॉ. संजय चोरडिया, लायन्स क्लबच्या सीमा दाबके, ‘सूर्यदत्ता’च्या संचालिका कॅप्टन शालिनी नायर, संचालक अक्षित कुशल, सुनील धाडीवाल आदी उपस्थित होते. पुण्यातील नामवंत डॉक्टरांकडून ही आरोग्य तपासणी करण्यात आली. दंत तपासणी, पूर्ण शरीराची तपासणी, रक्त तपासणी, ईसीजी आणि हृदयरोग तपासणी करण्यात आली. डॉ. दीपाली कोलते, डॉ. अस्लम, डॉ. दीपक पाटील, डॉ. सुहास एरंडे व सहकाऱ्यांनी ही तपासणी केली.
तपासणीनंतर ज्यांना आवश्यकता आहे, अशा रुग्णांना तज्ज्ञ सल्ला व समुपदेशनासाठी पाठविण्यात आले; तसेच जीवनशैली बदलण्याचा आणि वैद्यकीय उपचार घेण्याचा सल्ला देण्यात आला.
‘आज समाजामध्ये, विद्यार्थ्यांमध्ये जीवनशैली, शारीरिक मानसिक व भावनिक आरोग्य याविषयी अनेक समस्या आहेत. त्यातून बाहेर पाडण्यासाठी अशा प्रकारचे उपक्रम सूर्यदत्ता इन्स्टिट्यूट नियमितपणे राबवत आहे. विद्यार्थी, शिक्षक-शिक्षकेतर कर्मचाऱ्यांसह परिसरातील नागरिकांनी या शिबिराचा लाभ घेतला,’ असे डॉ. चोरडिया यांनी नमूद केले.
