हिमायतनगर : समाधानकारक पाऊस पडत नसल्यामुळे मराठवाड्यात बळीराजा हवालदिल झाला आहे. त्यामुळे आता वरुणराजाला प्रसन्न करण्यासाठी हिमायतनगर येथील श्री परमेश्वर मंदिरात येथे पर्जन्ययाग रुद्र स्वाहाकार महायज्ञाचे आयोजन करण्यात आले आहे. २१ जुलै ते २७ जुलै या काळात हा महायज्ञ होणार आहे. त्या वेळी एक लाख झाडेही लावण्यात येणार आहेत.
हदगाव-हिमायतनगर विधानसभा मतदारसंघाचे आमदार नागेश पाटील-आष्टीकर या कार्यक्रमाच्या अध्यक्षस्थानी असतील. दररोज सकाळी नऊ ते १२ या कालाधीत महायज्ञ होणार असून, दररोज दुपारी भजन आणि कीर्तनाबरोबरच महाप्रसादाच्या कार्यक्रमाचेही आयोजन करण्यात आले आहे. शिवसेना पक्षप्रमुख उद्धव ठाकरे आणि नागेश पाटील-आष्टीकर यांच्या वाढदिवसानिमित्त आयोजित करण्यात आलेल्या या कार्यक्रमाच्या निमित्ताने एक लाख झाडेही लावण्यात येणार आहेत.
या कार्यक्रमात ११ यज्ञकुंड असतील. ३०० जोडपी दररोज यज्ञास बसणार आहेत. या कार्यक्रमासाठी हदगाव-हिमायतनगर विधानसभा मतदारसंघातील नागरिकांनी उपस्थित राहण्याचे आवाहन आष्टीकर, श्री परमेश्वर मंदिर कमिटीचे अध्यक्ष व हिमायतनगरचे नगराध्यक्ष कुणाल राठोड, शिवसेना तालुकाप्रमुख रामभाऊ ठाकरे यांच्याकडून करण्यात आले आहे.