ऑफिसच्या वेळा, मुलांचं शिक्षण, महिन्याचं बजेट, भविष्याची तरतूद... टेन्शनची कारणं एक ना अनेक. धकाधकीच्या जीवनात निरागस हास्य आणि निवांत क्षण कुठे तरी हरवत चालले आहेत. या पार्श्वभूमीवर, धमाल मनोरंजनाचं औषध घेऊन येतेय ‘स्टार प्रवाह’ची नवी मालिका ‘वैजू नंबर वन.’
खरं तर आयुष्यात आपण प्रत्येक जण खूप सारी स्वप्नं पाहत असतो. काही जणांची स्वप्नं पूर्ण होतात. काही मात्र आयुष्यभर या स्वप्नांचा पाठलाग करत रहातात. ‘वैजू नंबर वन’ मालिकेतली वैजू स्वप्नाळू आहेच; पण प्रत्येक स्वप्न पूर्ण करण्याचा मजेशीर मार्गही तिच्याकडे आहे. साताऱ्यात वाढलेल्या वैजूला पोलिस सेवेत जाण्याची इच्छा होती. काही कारणामुळे ती पूर्ण होऊ शकली नाही; मात्र पोलिस खात्यातील मुलाशी लग्न करुन तिने ती पूर्ण करून घेतली.
साताऱ्याहून मुंबईतल्या ‘तिसरी मंजिल’ चाळीत आल्यावर तिने आपल्या प्रेमळ स्वभावाने सर्वांनाच आपलंसं करून घेतलं. प्रॉब्लेम कोणताही असो, वैजूकडे प्रत्येक प्रॉब्लेमवर सोल्यूशन असतं. त्यामुळेच संपूर्ण चाळीत ती नंबर वन ठरते.
‘तिसरी मंजिल’ चाळ नावाप्रमाणेच थोडी फिल्मी आहे. महाराष्ट्राच्या विविध भागांतून आलेली मंडळी या ‘तिसरी मंजिल’मध्ये अगदी गुण्यागोविंदाने राहतात. टोलेजंग इमारतींच्या शहरात चाळ संस्कृती हळूहळू लुप्त होण्याच्या मार्गावर आहे. चाळ हा प्रत्येकाच्या मनातला असा एक हळवा कोपरा आहे, ज्याच्या आठवणी पुसणं हे केवळ अशक्य आहे. वैजू नंबर वन मालिकेतलं हे २२ खोल्यांचं कुटुंब नक्कीच निखळ मनोरंजन करील. दैनंदिन आयुष्यतल्या घडामोडी मजेशीर पद्धतीने या मालिकेतून प्रेक्षकांसमोर येतील.
वैजू नंबर वन मालिकेविषयी सांगताना स्टार प्रवाहचे कार्यक्रम प्रमुख सतीश राजवाडे म्हणाले, ‘वैजू नंबर वन ही एक हलकीफुलकी आणि आपल्या आजूबाजूला घडणारी गोष्ट आहे. अतिशय प्रेमळ आणि रोजच्या जीवनात होणाऱ्या गोष्टींशी निगडित असलेली कथा, धकाधकीच्या आयुष्यात तुमचं टेन्शन विसरायला लावेल अशी ही मालिका आहे.’
सोनाली पाटील ही नवोदित अभिनेत्री वैजू शिर्केची भूमिका साकारत असून, समीर खांडेकर वैजूच्या पतीच्या म्हणजेच सुशील शिर्केच्या भूमिकेत दिसणार आहे. यासोबतच ईला भाटे, अविनाश नारकर, मिहिर राजदा, प्रभाकर मोरे, संजीवनी जाधव, श्रीजित मराठे, नीता पेंडसे, संजय कुलकर्णी, भरत सावले, मीनल बाळ अशी दमदार कलाकारांची फौज मालिकेत दिसणार आहे. होलाका क्रिएशन्सने या मालिकेची निर्मिती केली असून, संजय जाधव, प्रोमिता जाधव, हर्षदा खानविलकर आणि दीपक राणे या मालिकेचे निर्माते आहेत. वैभव चिंचाळकर या मालिकेचे दिग्दर्शक आहेत.
‘वैजू नंबर वन’ ही मालिका सोमवार ते शनिवार रात्री १० वाजता स्टार प्रवाहवर प्रसारित होणार आहे.
