पिंपरी : डॉ. डी. वाय. पाटील रुग्णालयातील एका मेंदू मृत महिलेचे अवयवदान करण्यात आल्याने पाच रुग्णांना जीवदान मिळाले. डॉ. डी. वाय. पाटील रुग्णालयातच ही अवयवदान आणि अवयव प्रत्यारोपणाची प्रक्रिया यशस्वीरीत्या पूर्ण करण्यात आली.
अपघातात जखमी झालेल्या ६० वर्षीय महिलेला मेंदू मृत घोषित करण्यात आले होते. अवयवदान केल्यास अन्य पाच जणांचे प्राण वाचू शकतात याची माहिती प्रत्यारोपण विभागाच्या समन्वयकांनी रुग्णाच्या कुटुंबीयांना दिली. त्यांचे समुपदेशन करून त्यांच्या सर्व शंकांचे निरसन केले. मृत महिलेच्या कुटुंबीयांनीही आपले दुःख बाजूला ठेवून, अवयवदानाचा निर्णय घेतला. मृत महिलेचे यकृत, दोन मूत्रपिंडे आणि दोन नेत्रपटल हे अवयव दान करण्यात आले.
‘आई गेल्याचे दुःख आहेच; परंतु तिचे अवयव दान करून इतर पाच व्यक्तींमध्ये आईला जिवंत पाहू शकू’, अशी भावना अवयवदात्या महिलेच्या मुलाने व्यक्त केली.
डॉ. डी. वाय. पाटील रुग्णालयातील ६१ वर्षीय रुग्णावर यकृत प्रत्यारोपण, तर ४७ वर्षीय पुरुष व ३३ वर्षीय स्त्री अशा दोन रूग्णांवर मूत्रपिंड प्रत्यारोपण करण्यात आले. अवयवदात्याच्या नातेवाईकांचा निर्णय; तसेच रुग्णालयातील डॉक्टरांच्या व कर्मचाऱ्यांच्या वेगवान कृतीमुळे या रुग्णांना जीवनदान मिळाले.
‘अवयव प्रत्यारोपणाबाबत नागरिकांमध्ये जागरूकता वाढत आहे, मात्र अजूनही अवयवाची गरज असणारे रुग्ण आणि अवयवदाते यांच्या संख्येत प्रचंड तफावत आहे. जास्तीत जास्त नागरिकांनी अवयवदानाचा संकल्प करणे आवश्यक आहे,’ असे मत डॉ. डी. वाय. पाटील विद्यापीठाचे कुलपती डॉ. पी. डी. पाटील यांनी व्यक्त केले. अवयवदानाचा निर्णय घेतल्याबद्दल त्यांनी अवयवदात्याच्या कुटुंबीयांचे आभार मानले.
डॉ. डी. वाय. पाटील विद्यापीठ सोसायटीच्या उपाध्यक्षा भाग्यश्री पाटील यांनीही अवयवदात्याच्या कुटुंबीयांचे आभार मानले. ‘समाजातील लोकांनी अवयवदानाविषयी विचार करण्याची गरज आहे. आपण मरणानंतरही इतरांना जीवनदान देऊ शकतो. अवयवदानासाठी समाजाने पुढे येणे गरजेचे आहे. या वर्षभरात आठ रुग्णांच्या कुटुंबीयांनी घेतलेल्या अवयवदानाच्या निर्णयामुळे २० रुग्णांना जीवदान मिळाले असून, डॉ. डी. वाय. पाटील हॉस्पिटलमध्ये आतापर्यंत ९२ अवयव प्रत्यारोपण शस्त्रक्रिया यशस्वी झाल्या आहेत, ’ असे त्यांनी सांगितले.
डॉ. तुषार दिघे, डॉ. बिपीन विभुते, डॉ. दिपाली काटे, डॉ. आशिष चुग, डॉ. रेणू मगदूम, डॉ. स्मिता जोशी यांनी हे अवयव प्रत्यारोपण यशस्वी केले. डॉ. अमरजित सिंग, डॉ. जे. एस. भवाळकर, डॉ. एच. एच. चव्हाण यांचेही या प्रक्रियेत योगदान लाभले.
(ही बातमी इंग्रजीमध्ये वाचण्यासाठी येथे क्लिक करा.)