मुंबई : ‘स्टार प्रवाह’वर २२ एप्रिल २०१९पासून सुरू होणाऱ्या ‘जिवलगा’ या मालिकेच्या सेटवर नुकतेच एक सेलिब्रेशन पार पडले. निमित्त होते ते सिद्धार्थ चांदेकर याच्या आईच्या वाढदिवसाचे. रिअल लाइफमधली माय-लेकाची ही जोडी रिल लाइफमध्येही आई-मुलाच्या भूमिकेत आहे.
‘जिवलगा’ या मालिकेच्या निमित्ताने सिद्धार्थ आणि त्याची आई पहिल्यांदाच एकत्र काम करणार आहेत. सध्या या मालिकेचे चित्रीकरण सुरू असून, आईचा ५२वा वाढदिवस विशेष बनविण्यासाठी त्याने ‘जिवलगा’च्या सेटवर वाढदिवस साजरा करण्याचे नियोजन केले. त्याच्या या नियोजनात ‘जिवलगा’च्या संपूर्ण टीमने त्याला मदत केली आणि वाढदिवस उत्साहात साजरा करण्यात आला.
सिद्धार्थ आणि ‘जिवलगा’च्या संपूर्ण टीमकडूम मिळालेले हे खास ‘सरप्राइज’ पाहून सिद्धार्थची आई भारावून गेली होती. ‘आयुष्यातले काही क्षण न विसरता येणारे असतात. माझ्या आयुष्यातला हा अविस्मरणीय वाढदिवस आहे. हे आनंदाचे क्षण मला दिल्याबद्दल सिद्धार्थ आणि जिवलगाच्या संपूर्ण टीमचे आभार,’ अशी भावना त्यांनी व्यक्त केली.