पुणे : मराठी विज्ञान परिषद, पुणे विभाग आणि महाराष्ट्र ज्ञान महामंडळ (एमकेसीएल) यांच्या वतीने ‘नवीन शोध, बौद्धिक संपदा व पेटंट’या विषयावर प्रा. गणेश हिंगमिरे यांच्या व्याख्यानाचे आयोजन करण्यात आले आहे.
मयूर कॉलनीतील बालशिक्षण मंदिराच्या सभागृहात गुरुवारी, २५ जुलै २०१९ रोजी सायंकाळी ६.१५ वाजता हे व्याख्यान होणार असून, ते सर्वांसाठी विनामूल्य खुले आहे. महाविद्यालये व विद्यापीठात अनेक संशोधने होत असतात; तसेच अभियंते-शास्त्रज्ञ प्रयोग करून नवीन निर्मिती करतात. ही बौद्धिक संपदा चोरली जाते किंवा तिची कॉपी केली जाते. परिणामी मूळ संशोधकाला त्याच लाभ होत नाही. त्यामुळे पेटंट मिळवणे अतिशय महत्त्वाचे ठरते. भारतीय पेटंटचे महत्त्व, भारतातील पेटंट फाइल्सची वर्तमान स्थिती, पेटंट हक्काचे आर्थिक महत्त्व, भारतीय पेटंट संरक्षणाची जागतिक परिस्थिती, भौगोलिक निर्दर्शन अशा विविध मुद्द्यांवर प्रा. हिंगमिरे मार्गदर्शन करणार आहेत.
‘अधिकाधिक विज्ञानप्रेमी, विद्यार्थी व पालकांनी या व्याख्यानाचा लाभ घ्यावा,’ असे आवाहन विज्ञान परिषदेचे अध्यक्ष विनय र. र. यांनी केले आहे.