पुणे : ‘पुणे तेथे काय उणे’ ही उक्ती सार्थ करत, पुण्यामध्ये चक्क कचरा या संकल्पनेवर आधारित फॅशन शो आयोजित करण्यात आला होता. मिस आणि मिसेस माय अर्थ नावाच्या या फॅशन शोमध्ये प्लास्टिक बाटल्या, प्लास्टिक पिशव्या, इलेक्ट्रॉनिक वेस्ट (खराब झालेले की-बोर्ड, माउस, सीडी, डीव्हीडी) आणि इतर टाकाऊ वस्तूंपासून बनविलेले ड्रेस सादर करण्यात आले.
प्लास्टिक, इलेक्ट्रॉनिक कचरा यामुळे होणाऱ्या पर्यावरणाच्या हानीबद्दल लोकांमध्ये जागरूकता निर्माण करण्याच्या उद्देशाने ‘माय अर्थ फांउडेशन’ तर्फे या फॅशन शोचे आयोजन करण्यात आले होते. वनराई संस्था, दीपाली भोसले सय्यद फांउडेशन याचे सहआयोजक होते. महाराष्ट्र प्रदूषण नियंत्रण मंडळ आणि पुणे महापालिकेचेही याला सहकार्य लाभले.
‘सौंदर्य हे अलंकार स्त्रीचे, तसेच महत्त्व पृथ्वी मातेचे’ हा संदेश याद्वारे देण्यात आला. कार्यक्रमाचे प्रमुख पाहुणे म्हणून महाराष्ट्र प्रदूषण नियंत्रण मंडळाचे सद्स्य सचिव रावेन्द्रीयन, पुणे महानगरपालिका घनकचरा व्यवस्थापनाचे सहआयुक्त ज्ञानेश्वर मोळक, ‘माय अर्थ फांउडेशन’चे अनंत घरत, नितीन देशपांडे, वनराईचे अध्यक्ष रवींद्र धारिया, अभिनेत्री दिपाली भोसले-सय्यद आणि मिस युनिव्हर्स खुशबू करवा व मिसेस महाराष्ट्र योगिता गोसावी, बिग बॉस फेम अभिजित बिचुकले, ललित राठी, अमित वाडेकर, यशोधन भिडे आदी मान्यवर या वेळी उपस्थित होते.
अनंत घरत म्हणाले, ‘कचऱ्याला औद्योगिक महत्त्व प्राप्त झाले, तर कचरा रस्त्यावर पडणार नाही. याबाबत जनजागृती करण्यासाठी या फॅशन शोचे आयोजन करण्यात आले होते.’
(या फॅशन शोची झलक दाखविणारा व्हिडिओ सोबत देत आहोत. )