पुणे : एक लिटर पेट्रोलमध्ये तब्बल १६० किलोमीटर धावणारी बाइक! विश्वास बसत नाही ना; पण हे खरे आहे. अथर्व राजे या अभियांत्रिकीच्या विद्यार्थ्याने पेट्रोलची बचत करण्यासाठी जुन्या बाइकवर संशोधन करून ही अनोखी इलेक्ट्रिक पेट्रोल हायब्रिड बाइक विकसित केली आहे. त्यामुळे पेट्रोलच्या खर्चात बचत होईल, शिवाय ती पर्यावरणपूरकही असेल, असे त्याचे म्हणणे आहे. सध्याच्या ई-बाइक्स जास्त अंतर जाऊ शकत नाहीत. ती त्रुटी दूर करण्यासाठी त्याने हा प्रयोग केला आहे.
अथर्व राजे सिम्बायोसिस विद्यापीठात अभियांत्रिकीचे शिक्षण घेत असून, त्याचे निसर्गावर प्रेम आहे. त्याने बाइकमुळे होणाऱ्या प्रदूषणावर उपाय शोधून काढण्याचे ठरवले. त्याने त्याच्या आईकडे असलेली बारा वर्षांपूर्वीची जुनी मोपेड गाडी संशोधनासाठी वापरली. दोन महिने कठोर परिश्रम घेऊन त्याने मोपेडचा कायापालट केला. त्यातूनच बॅटरी आणि पेट्रोलवर चालणारी ही हायब्रिड बाइक साकार झाली.
‘सुरुवातीला पेट्रोलवर साधारण नऊ किलोमीटर धावल्यानंतर या बाइकमधील बॅटरी चार्ज होते आणि त्यानंतर ही बाइक ३२ किलोमीटर अंतर बॅटरीवर धावते. अशा प्रकारे एक लिटर पेट्रोलमध्ये बाइकची बॅटरी चार वेळा चार्ज होते. अशा प्रकारे ही बाइक एक लिटर पेट्रोलमध्ये एकूण १६० किलोमीटर धावते,’ असे अथर्व राजे याने सांगितले.
सध्या बॅटरीवर चालणाऱ्या ज्या बाइक्स आहेत, त्या एका चार्जिंगमध्ये जास्तीत जास्त ४० ते ५० किलोमीटर अंतर जाऊ शकतात. पेट्रोल पंपाप्रमाणे सार्वजनिक ठिकाणी चार्जिंगची सोय नसल्याने या इलेक्ट्रिक बाइकद्वारे जास्त अंतर जाता येत नाही, ही सध्याची अडचण आहे. याचा विचार करूनच अथर्वने ही हायब्रिड बाइक तयार केली आहे. त्यामुळे चार्जिंग संपल्यानंतर ही बाइक पेट्रोलवर धावते आणि त्या वेळी पुन्हा बॅटरी चार्ज होते. त्यामुळे पुढील प्रवास बॅटरीवर करता येतो.
या बाइकमुळे प्रदूषणात ७५ टक्के घट होईल, असा अथर्वचा दावा आहे. ‘सध्याच्या दुचाकी कमी अॅव्हरेज देतात. कालांतराने ते आणखी कमीच होत जाते. त्यामुळे अधिक पेट्रोल वापरले जाते आणि अधिक खर्च येतो. तसेच पर्यावरणाचेही नुकसान होते. याचा विचार करून ही बाइक विकसित केली आहे,’ असे अथर्वने सांगितले.
या बाइकसाठी त्याला गुजरात सरकारमार्फत एक्सेप्शनल इनोव्हेशन अॅवॉर्ड मिळाले असून, राष्ट्रीय पातळीवरही या बाइकचे कौतुक झाले आहे. अथर्वने या बाइकच्या पेटंटसाठी अर्ज केला आहे.