पुणे : भारतातील सर्वांत मोठी रुफटॉप सोलर डेव्हलपर असलेल्या आणि या बाजारपेठेत १५.८ टक्के हिस्सा असलेल्या ‘क्लिनमॅक्स सोलर’ कंपनीने पुण्यातील ‘आयसीएआर – नॅशनल रिसर्च सेंटर फॉर ग्रेप्स’साठी रुफटॉप सोलर प्लँट विकसित आणि कार्यान्वित केला आहे. ७० केडब्ल्यूपी क्षमतेच्या या रुफटॉप ग्रिड सोलर इन्स्टॉलेशनचे उद्घाटन ‘डिपार्टमेंट ऑफ ॲग्रिकल्चरल रिसर्च अँड एज्युकेशन’चे (डीएआरई) सचिव, तथा ‘आयसीएआर’चे सरसंचालक डॉ. त्रिलोचन मोहपात्र आणि संचालक डॉ. एस. डी. सावंत यांच्या हस्ते झाले.
अंदाजे ७० चौरस फूट क्षेत्रात पसरलेला हा रुफटॉप सोलर प्लँट वीजवितरण जाळ्याशी जोडण्यात आला असून, त्यातून वर्षाला एक लाख केडब्ल्यूएच वीजनिर्मिती होण्याचा अंदाज आहे. रिसर्च सेंटरमध्ये स्थापित केलेला हा प्रकल्प ‘पे ॲज यू गो’ अथवा ‘ओपीईएक्स’ प्रारुपावर आधारित आहे. तो गुंतवणूक मुक्त, जोखीम मुक्त व अडथळा मुक्त असून, तो वीज जाळ्यापेक्षा जवळपास सरासरी ३० टक्के स्वस्त दरात वीजपुरवठा करु शकेल.
यासंदर्भात ‘क्लिनमॅक्स सोलर’चे सहसंस्थापक अँड्र्यू हाइन्स म्हणाले, “कंपन्यांना रुफटॉप सोलर सोल्यूशन्स देण्याच्या उद्योगातील आघाडीची कंपनी या नात्याने, आम्हाला सरकार व संस्थात्मक ग्राहकांना सौरऊर्जेचा वापर करण्यात मदत करण्याची मोठी संधी मिळाली आहे. आयसीएआरला शाश्वतता ध्येये गाठण्यास आणि त्याचवेळी खर्चबचत साधण्यात मदत करण्याने आमचा गौरव झाला आहे.”
ते पुढे म्हणाले, “सरकारी विभाग वाढत्या संख्येने आपल्या इमारतींचे सौरविद्युतीकरण करण्याचे आव्हान पेलताना बघून आम्हाला आनंद होत आहे. पुण्यातील हा प्रकल्प त्याच्या कार्यकाळात ९९ टन कार्बन डाय ऑक्साईड कमी करण्याचा अंदाज आहे. आयसीएआर, आयआयटी, बनारस हिंदू युनिव्हर्सिटी, कर्नाटकातील सुरत्कल येथील नॅशनल इन्स्टिट्यूट ऑफ टेक्नॉलॉजी (एनआयटी) तसेच पुणे, मुंबई व बंगळुरुतील आयकर भवन, प्रतिष्ठा भवन, कस्टम्स अँड एक्साईज बिल्डिंग यांनी आमची सोलर सोल्यूशन्स अंगीकारली आहेत.”
‘नॅशनल रिसर्च सेंटर फॉर ग्रेप्स’ ही संस्था सुरक्षित द्राक्ष उत्पादन व उत्पादकता, द्राक्षांच्या सुधारित व शाश्वत उत्पादनासाठी सहयोगींना तंत्रज्ञान हस्तांतर व क्षमता वर्धन पुरवण्यात व्यूहात्मक व उपयोजित संशोधन करण्यात नैपुण्य प्राप्त केलेली आहे.
