गेल्या २० वर्षांपासून सातत्याने आपले विचार निर्भीडपणे मांडणाऱ्या शरद पोंक्षे या एका मनस्वी कलावंताने आपले अनुभव ‘मी आणि नथुराम!’ या पुस्तकाद्वारे मांडले आहेत. त्यांचे हे पुस्तक शब्दामृत प्रकाशनतर्फे २० एप्रिल २०२१ रोजी प्रकाशित होत आहे. बुकगंगा डॉट कॉमवर या पुस्तकाची पूर्वनोंदणी केल्यास ४५० रुपयांचे हे पुस्तक ३५० रुपयांत मिळणार आहे.
(पुस्तक नोंदणीची लिंक शेवटी दिली आहे.)
इतिहासातल्या एका महत्त्वाच्या घटनेची ‘दुसरी बाजू’ मांडणारी एक दर्जेदार नाट्यकृती म्हणजेच ‘मी नथुराम गोडसे बोलतोय!’ या नाटकाच्या माध्यमातून ‘नथुराम’ रंगमंचावर आला आणि गदारोळ सुरू झाला! नथुरामच्या भूमिकेत होते अभिनेते शरद पोंक्षे! स्वतःला बापूंचे पक्के अनुयायी म्हणवणाऱ्यांनी हाणामारी, तोडफोड, जाळपोळ करून अक्षरशः धुमाकूळ घातला.
या सगळ्यात खंबीरपणे पाय रोवून उभे राहिले शरद पोंक्षे! ते लढले, त्यांना बरेच काही सोसावे लागले. त्यांना हा संघर्ष कधी न्यायालयासोबत, कधी राजकीय पक्षांसोबत, तर कधी जवळच्या लोकांसोबतही करावा लागला.
या पुस्तकाबद्दल शरद पोंक्षे म्हणाले, ‘हे माझे पहिले पुस्तक! एखाद्या अभिनेत्याला एखादी भूमिका अशी मिळते, की ती त्याचे अख्खे आयुष्य ढवळून काढते. ती फक्त रंगमंचावर सादर करण्यापुरती मर्यादित राहत नाही, तर पडदा उघडण्यापूर्वी आणि पडदा पडल्यानंतरही त्याला त्या भूमिकेमुळे बराच संघर्ष करावा लागतो. अतोनात प्रेम मिळतंच; पण त्याचबरोबर खूप अवहेलनेला, जिवावर बेतणाऱ्या प्रसंगांनाही तोंड द्यावे लागते. मलाही नथुराम गोडसे ही भूमिका मिळाली ती अशीच! २० वर्षे, ११०० प्रयोग एवढा हा संघर्ष तुमच्यासोबत वाटून घ्यावा म्हणून हे पुस्तक लिहिले आहे.’
‘ज्या मायबाप रसिकांनी ही भूमिका अजरामर केली, त्यांच्यासाठी व नवीन येणाऱ्या कलावंतांसाठी ह्या वर्षांची ही माझी भेट आहे,’ अशा शब्दांत त्यांनी आपले मनोगत व्यक्त केले.
संपर्क (बुकगंगा) : 8888300300
संपर्क (शब्दामृत) : 9970077255
