डिजिटल युगात हातानं लिहिण्याचं प्रमाण कमी होत चाललं आहे ही वस्तुस्थिती; पण हातानं लिहिण्यातला आणि सुंदर, वळणदार अक्षरांत लिहिलेलं वाचण्यातला आनंद डिजिटल अक्षरांना येत नाही, हेही तितकंच खरं. म्हणूनच दर वर्षी २३ जानेवारीला जागतिक हस्ताक्षर दिन साजरा केला जातो. या दिनाचं औचित्य साधून ‘असंच होतं ना तुलाही’ या हस्तलिखित कवितासंग्रहाच्या दुसऱ्या आवृत्तीचं प्रकाशन आज (२३ जानेवारी २०२०) पुण्यात होत आहे.
संगीतकार, गायक, चित्रकार आणि कवी असे बहुपैलू व्यक्तिमत्त्व असलेले मिलिंद जोशी यांनी आपल्या अर्थपूर्ण रचना स्वतःच्या सुंदर हस्ताक्षरात लिहून या कवितासंग्रहातून सादर केल्या आहेत. बुकगंगा पब्लिकेशन्सने प्रकाशित केलेल्या या कवितासंग्रहाची पहिली आवृत्ती अवघ्या महिन्याभरात संपली, यावरून तो कवितासंग्रह रसिकांना किती आवडला, याची प्रचिती येते. ई-बुक आणि ऑडिओ बुक स्वरूपातही हा कवितासंग्रह उपलब्ध आहे. त्यातील काही कविता येथे प्रसिद्ध करत आहोत.
२३ जानेवारी रोजी सायंकाळी साडेसहा वाजता पुण्यातील नव्या पेठेतील पत्रकार भवनात होणाऱ्या प्रकाशन सोहळ्याला अभिनेत्री मुक्ता बर्वेही उपस्थित राहणार आहे. तसेच, त्या वेळी हा कवितासंग्रह सवलतीत उपलब्ध होणार आहे.
