उद्योगपती व्हायचे, हे स्वप्न महत्त्वाकांक्षी असून, त्याची पायवाटही खडतर असते; मात्र ध्येय, जिद्द, परिश्रम, सचोटी, प्रामाणिकपणा, व्यवहार्यता, मानवता या गुणांशी जुळवून घेतले, की यशस्वी उद्योजकाची ‘मंजिल’ सहज साध्य होऊ शकते, अशी शिकवण संभाजीराजे प. घोरपडे यांनी ‘उद्योगपती, करोडपती व्हावं कसं?’ या पुस्तकामधून दिली आहे. धंदा कसा करावा, त्यासाठी आवश्यक गुणवैशिष्ट्ये, मानवी स्नेहसंबंध, महाराष्ट्रीय माणसे उद्योगात मागे का?, व्यवसाय व नोकरीचे समालोचन, श्रीमंतीचा मूलमंत्र, गुंतवणूक व्यवस्थापन, पॉझिटिव्ह थिकिंग अशा प्रकरणांमधून १७५ मुद्द्यांवर त्यांनी मार्गदर्शन केले आहे. पुढे टाटा, बिर्ला उद्योगसमूह, अंबानी, भंवरलाल जैन, अमूल उद्योग यांची यशोगाथा, तसेच ‘केएफसी’चे कर्नल हार्लंड सँडर्स, अॅरिस्टॉटल ओनॅसिस, बार्बी थॉमस, डोनाल्ड ट्रम्प, जिलेट किंग कँप, सॅम वॉल्टन, स्टीव्ह जॉब्ज अशा आंतरराष्ट्रीय पातळीवरील उद्योजकांची माहिती दिली आहे. मुंबईचे डबेवाले, लिज्जत पापड, एस्सेल ग्रुप, स्वयंसिद्धा, प्रवीण मसाले यांचीही ओळख या पुस्तकात करून देण्यात आली आहे.