पुणे : शक्ती आणि बुद्धी कौशल्याचा कस लागणाऱ्या कबड्डी खेळातील चालींचा उपयोग महिलांना स्वसंरक्षणासाठीही करता येऊ शकतो, याचे प्रात्यक्षिक ‘पुणेरी पलटण’ने दाखवले.
कबड्डीमधील चाली महिलांना स्वसंरक्षणासाठी उपयुक्त ठरतात याचे धडे देणारी कार्यशाळा शनिवारी, २ सप्टेंबर रोजी ‘मल्टीफिट’च्या सेनापती बापट रस्त्यावरील शाखेत घेण्यात आली.
प्रो- कबड्डी लीगमधील एक प्रमुख संघ ‘पुणेरी पलटण’चे मुख्य मार्गदर्शक आणि कबड्डीपटू अशोक शिंदे यांनी या वेळी मार्गदर्शन केले. त्यांनी कबड्डी खेळामधील विविध चालींचा वापर महिला आणि मुली आपत्कालीन परीस्थितीत स्वसंरक्षणासाठी कसा करू शकतात, हे सांगितले.
चोक डिफेन्स, कीक्स, पंचेस यासह विविध मार्शल आर्ट्सच्या चाली शिकवण्यात आल्या ; तसेच आपत्कालिन परिस्थितीत लवकरात लवकर जवळच्या पोलीस स्टेशनला कसे जायचे, या संबंधीदेखील माहिती देण्यात आली. या कार्यशाळेला पुण्यातील महिलांचा उत्स्फूर्त प्रतिसाद मिळाला.
या वेळी अशोक शिंदे म्हणाले, ‘ कबड्डी हा एक आक्रमक खेळ असून यातील बऱ्याच चाली या मार्शल आर्ट्स सारख्या आहेत. महिलांनी स्वतःच्या बचावासाठी सक्षम असले पाहिजे. आजच्या कार्यशाळेचा महिलांना निश्चितच फायदा होईल, अशी मला खात्री आहे.’ या वेळी पुणेरी पलटणचे सीईओ कैलाश कांडपाल उपस्थित होते.